СООПШТЕНИЕ
Од Свештеникот, Управниот одбор, членовите и верниците при Македонската Православна Црква-ОА „Св. вмч Ѓорѓи Кратовски“ од Фармингтон Хилс, Мичиген, САД
Драги отци, браќа и сестри,
По молба на нашиот парохиски свештеник ереј Горан Трпчевски, ни беа подарени мошти од нашиот патрон Светиот Великомаченик Ѓорѓи Кратовски, од Драгалевскиот Манастир.
По милоста Божја и по молитвите на Светиот Великомаченик Ѓорѓи Кратовски и со благослов од нашиот надлежен Архиереј, Митрополитот на Американско-Канадската Македонска Православна Епархија г. Методиј, на 8 септември 2019 лето Господово, во нашата Македонска Православна Црква-ОА “Св. Вмч Ѓорѓи Кратовски” во Фармингтон Хилс, Детроит Метро во Мичиген, САД, пристигнаа Моштите на светителот донесени од ѓаконот д-р Дејан Коруноски.
По предавањето на Моштите, се одржа Света Архиерејска Литургија, со која чиноначалствуваше Митрополитот г. Методиј во сослужение на Архиерејскиот Намесник на Централно-западното Американско Архиерејско Намесништво, протоереј Драган Јорданов и парохискиот свештеник ереј Горан Трпчевски.
После службата се пристапи кон поклонение на Светите Мошти од страна на клирот и на верниот народ, по што беше приреден и свечен празничен ручек, во дворот на нашата Црква.
Ова е историски момент не само за нашата Црква, туку и за нашата Епархија и за целата Македонска Православна Црква. Овој бесценет дар, останува во нашата Црква, па сега го имаме нашиот патрон Св. Вмч Ѓорѓи Кратовски и физички присутен во нашата Црковна заедница.
Не случајно Бог благослови да имаме еден голем светител од нашиот род овде, далеку од нашата татковина. Читајќи го житието на светителот, не можеме да останеме имуни на неговиот подвиг и мачеништвото што тој го направи, кое за нас треба да биде пример како се сака Христос, како се пострадува за својата вера и за својот народ.
Изразуваме голема благодарност до благочестивото семејство Коруноски, особено до ѓаконот д-р Дејан Коруноски, до г-дин Спасе и г-ѓа Љубица Недановски, како и нашата женска секција и женската секција од сестринската црква „Раѓање на Пресвета Богородица“ од Стерлинг Хајтц, за преубавиот ручек, до г-дин Бранко Арсов, кој го овековечи овој настан преку неговите фотографии и до сите други кои помогнаа пречекот да помине во најдобар ред и секако до нашиот духовен татко Митрополитот Методиј.
По молитвите на Светиот Великомаченик Ѓорѓи Кратовски и на светите отци наши, Господе Исусе Христе, помилуј не!
-------------------------------------------------------------------------------
--
Reverend Goran Trpchevski
MOC "St. George of Kratovo"
29141 West 12 Mile Road
Farmington Hills, MI 48334
(586) 216-0648
