Странски дела ќе ги засенат домашните книги
Автори, актуелни на светските топ-листи ќе бидат најмногу застапени на саемските штандови, а домашното творештво ќе биде претставено со стари изданија
Малку домашни и многу нови преведени книги ќе бидат застапени на годинашниот 20. Меѓународен саем на книгата, кој свечено ќе биде отворен вечерва, во 19.30 часот во „Метрополис-арената“ на Скопското сајмиште. Со стотици романи, раскази, психолошки книги, историски дела, монографии, книги за деца ќе настапат шеесетина домашни издавачи, кои ќе бидат распоредени на простор од 4.000 квадратни метри. Централното место повторно ќе го имаат „Матица македонска“, „Култура“, „Просветно дело“, „Три“, „Табернакул“, а помалите книгоиздателства ќе се распоредат по краевите на халата. Меѓународниот белег на големата манифестација ќе и' го дадат десетина балкански издавачи.Книгоиздателствата се надеваат дека читателите годинава најмногу ќе ги придобијат со преводите на дела од европски и од американски автори. „Или-Или“ како новитети ќе ги понудат „Чиста анархија“ од Вуди Ален, „Колекционер“ од Џон Фаулс, „Катедрала“ од Рејмонд Карвер.Се надевам дека со нашиот избор ќе ги задоволиме вкусовите на читателите. Простор ќе им дадеме и на домашни автори-дебитанти, кои ги охрабруваме да создаваат, зашто нивните дела се значајни за развојот на македонската книжевност - вели Ненад Стевовиќ од „Или-Или“.
БЕЗ САЛА ЗА ПРОМОЦИИ
Со преводи ќе настапат и од „Феникс“, кои освен романескна литература, ќе понудат и книги за деца како „Книга за природата“, „Најпознатите светски откритија“, „Бајки“ од браќата Грим.На читателите ќе им ја понудиме светската книжевна мисла. Саемот е културен настан, на кој го презентираме тоа што се случува во творештвото - вели Христо Петревски од „Феникс“. Книгоиздателството „Ми-Ан“ ќе се претстави со енциклопедии за историјата, културата и за уметноста. На нивниот штанд, меѓу другите, ќе бидат изложени и „Македонски деветнаесетти век 1800-1902“ и „Македонски среден век“, кои беа објавени деновиве.
- Енциклопедиите се дела што ја содржат меморијата за нашето историско, културно, мисловно и духовно постоење. Тие се доказ и за зрелоста на нашата научна мисла. Затоа сосема заслужено треба да дојдат до читателите - вели Јован Павловски од „Ми-Ан“. Годинава на Саемот на книгата нема да има сала за промоции. Издавачите се договориле промоциите да ги одржуваат на своите штандови.Причината за таквата одлука била што во претходните изданија на манифестацијата само малкумина читатели доаѓале на организираните промоции.Салата за промоции се покажа како промашување. Саемот, како настан, самиот за себе е една голема промоција. Непотребно е луѓето да се водат во просторија каде што ќе им се зборува за книга што веќе ја гледаат на штандовите - вели Глигор Стојковски од книгоиздателството „Култура“. На нивниот штанд ќе бидат изложени и дваесет нови романи од странски автори чие творештво е на светските листи со најчитани дела.
НЕМА ДА ИМА НИТУ КАТАЛОГ
На 20. Саем ќе нема ниту каталог за изданијата изложени на штандовите. Книгоиздателствата процениле дека парите што ќе ги дадат за печатење на каталогот ќе им бидат залудно потрошени, бидејќи досега посетителите не се интересирале за тоа издание.За авторите, издавачите, подготвувачите на изданијата годинава се предвидени двојно повеќе награди и признанија отколку лани. Здружението на издавачи и книжари на Македонија првпат ќе врачи награда за наш најдобар и најстар жив писател. Ќе ги доделат и вообичаените награди, за најдобро издание помеѓу двата саема, за најпродавана книга, за најдобар библиотекар и за најдобар книжар.Награди ќе дели и Конзорциумот на издавачи. Ќе бидат врачени признанија за најдобро уреден штанд, за најдобра саемска презентација и промоција и за најдобар странски издавач. Работното време на саемот ќе биде од 10 до 20 часот. Билет ќе чини 30 денари. Привилегирани ќе бидат студентите и учениците, кои за влез ќе плаќаат 20 денари.
Светска промоција на „Скриена Македонија“ од Делисо
Македонското издание на книгата „Скриена Македонија“ од американскиот патописец Кристофер Делисо ќе биде промовирано во сите саемски дена на штандот на „Матица македонска“. По тој повод ќе бидат промовирани видеоспот за Македонија, рекламни материјали за нашата земја, а ќе гостуваат и дипломати, кои ќе зборуваат за книгата. Од издавачката куќа најавија дека тоа ќе биде подготовка за презентација на Македонија на големиот саем на книгата што во октомври ќе се одржи во Франкфурт.
Тоше Огњанов-Дневник
