Достоен! – Проф. д-р Ѓоко Ѓорѓевски пострижен за монах и ракоположен во јероѓаконски чин

         На 27 и 28 мај 2025 година, во манастирот „Свети великомаченик Георгиј“ во Криви Дол, Скопје, се одржаа значајни духовни настани за Македонската православна црква – Охридска архиепископија. Д-р Ѓоко Ѓорѓевски, редовен професор на Православниот богословски факултет „Св. Климент Охридски“ во Скопје и поранешен декан на истиот, прими монашки постриг и беше ракоположен во јероѓаконски чин, добивајќи го името Георгиј.
          На 27 мај, во навечерието на празникот Оддание на Воскресение, а воедно и денот кога Црквата го слави споменот на светите Гаврил Велички и Ахил Преспански, Неговото Блаженство Архиепископот Охридски и Македонски г. г. Стефан отслужи вечерна богослужба, на која го замонаши проф. д-р Ѓорѓевски во чин мала схима, давајќи му го монашкото име Георгиј.
Следниот ден, на 28 мај, за време на Божествената Литургија, Неговото Блаженство Архиепископот Охридски и Македонски г. г. Стефан го ракоположи монахот Георгиј во јероѓаконски чин.
         Оваа духовна преобразба и принесување на животот во служба на Христа и Црквата е голема радост за целата наша Света Црква. Особена е честа и благодарноста и за академската заедница на Православниот богословски факултет, каде јероѓаконот Георгиј и понатаму ќе го сведочи Евангелието и ќе го пренесува искуството на верата и богословската мисла на новите генерации студенти.
Професорот Ѓорѓевски – сега јероѓакон Георгиј – е познат по своето длабоко богословско знаење, лична посветеност и несебична љубов кон Црквата. Неговото монашко и ѓаконско служење е сведоштво за соединувањето на науката и духовноста, на словото и молитвата, на умот и срцето.
Достоен е! Нека Господ го утврди во неговото ново служење и нека неговиот пример биде поттик за сите кои Го љубат Христа и сакаат да Му служат со сето свое битие.

Православен богословски факултет „Св. Климент Охридски“ - Скопје