Ресен, 23. 06. 2013 год.- храм Света Троица
Во храмот Света Троица во Ресен, на 23 јуни 2013 година, на празникот на Слегувањето на Светиот Дух врз апостолите – Педесетница ,Митрополитот Европски г. Пимен , отлужи Божествена Литургија.На Литургијата верниот народ се причести со Светите Христови Тајни.
Митрополит Европски г. Пимен:
Драги браќа и сестри!
Слушајќи од светото Евангелие и познавајќи ве како воцрковени личности, знаеме дека денеска Црквата го празнува слегувањето на Св. Дух врз апостолите, во оној момент кога биле собрани заедно на молитва со Мајката Божја, кога се слушнал шум и Светиот Дух, во вид на огнени јазици, слегол врз секого од апостолите. Првиот плод на Духот, бил дарот на јазици и дарот на знаењето, и простите рибари, кои што на почетокот не можеле да ги разберат ни обичните параболи кои што Христос ги кажувал, одненадеж станале богомудри, познавајќи ги богословските вистини на верата кои ниту ги прочитале, нити од човек им биле откриени. Така простите рибари, станале ловци на луѓе како што се вели во денешниот тропар. Сите дарови што ни се даваат од нашиот Отец Небесен , се за наше спасение, но и за спасение на многумина. Така и апостолите, просветлени од Божјата благодат, излегуваат на проповед на плоштадот во Ерусалим, каде тогаш имало многу народ, и се случило чудото со јазиците - секој од дојдените го слушал својот јазик.
Бог, кој сака сите да се спасат, ги праќа апостолите на проповед низ целиот свет, да го проповедаат Евангелието на секој народ. И благодарение на тој дар, истиот ден, мноштво луѓе станале членови на Црквата Христова, и овој ден се смета за роденден на Црквата. Од овој момент Црквата расте, преку 70 –те апостоли, се пренесува низ целиот свет.
Исто така, слушајќи го денешниот апостол, можеме да извлечеме голема поука. Иако некогаш не ги чувствуваме Божјите дарови и Божјото присуство во нашиот живот, било поради нашата гревовност, или заради наше смирение, треба да истраеме во молитвата. Зашто иако апостолите се озариле со Христовото Воскресение, после Вознесението биле тажни, на еден начин „богооставени“. Но, и понатаму се молеле во Ерусалим и го чекале исполнувањето на ветувањето дека Бог ќе го испрати Духот Утешител. Тоа треба да ни даде голема надеж, и во моментите кога ќе чувствуваме дека Бог е далеку од нас, дека не ги слуша нашите молитви, заради нашата грешност или заради испитување на нашето трпение, да не очајуваме, туку да истраеме во молитвата и Господ Бог ќе ни го испрати Својот Дух. Нека Бог, по молитвите на сите негови светии Го испрати Својот Свет Дух врз секого од нас, да нѐ просвети и обогомудри, та Тој да почива во нас, до населувањето наше во Царството Небесно.
Нека е честито, и од Бога благословено!
Ресен, 23 јуни, лето Господово 2013
За Преминпортал: Златко Дивјаковски
