На денот кога Светата Божја Црква го празнува денот на  Свети Тарасиј, патријарх Цариградски и Преподобниот Пафнутиј Кефалас, во храмот Свети Георгиј - Криви Дол беше отслужена Архиерејска Литургија, со која чиноначалствуваше Неговото Високопреосвештенство, Митрополитот Американско-Канадски Методиј, во сослужение на презвитер Игор Калпаковски и ѓакон Горан Стојчевски.

Денешниот ден е ден на простување, ден кога христијаните со братски целив и поклон едни пред други, си ги простуваат гревовите, за со мир да влезат во патот и подвигот кој им претстои.

Митрополитот во својата беседа изречена после читањето на Евангелието, зборуваше за значењето на простувањето и измирувањето како подготовка за вистински пост..

“Најпрво да им ги простиме грешките на нашите ближни, зашто од тоа зависи проштевањето и на нашите гревови. Со каква мера мериме, со таква и нас ќе ни се мери. Со каков суд судиме, со таков ќе ни се суди.
Токму затоа, започнувајќи го постот којшто е пат кон воскресението Господово, којшто е исполнет со никогаш незаборавеното страдание Господово, со Неговото распнување, со Неговата смрт, со сето она што што Господ го направи од љубов кон нас, да го започнеме токму со тоа – со измирувањето. Зашто без вистински мир внатре во себе, на човека му е тешко да прости. А пак, за постот Господ вели: измијте ги вашите лица, помажете ги вашите глави, не за да покажете дека постите пред луѓето, туку пред Бога. Таа благоразумност и таа благообразност со која човек треба да се украси за време на Великиот Пост почнуваат и завршуваат токму со милосрдието. Зашто и во благоразумноста, значи во сето она што го размислуваме, сето она што го наумуваме, суштинско е милосрдието. И во благообразноста, односно делањето на милосрдни дела исто така суштинско е милосрдието. А таа вистинска милостиња е принос кој треба да Му Го принесеме на Бога, служејќи им на своите ближни“.

Подготвиле:

 Дарко Петровски,

М.З.

Преминпортал

Посети:{moshits}