Презентиран проектот „Публикации за најзначајните вредности на културното и природното наследство“
Скопје, 13 август 2009(МИА) - Министерката за култура Елизабета Канческа-Милевска денеска ја презентираше програмата за проектот „Публикации за најзначајните вредности на културното и природното наследство“, кој опфаќа печатење на сто и педесет публикации и научно-популарни книги, поделени во четири едиции и една посебна книга за Скопје.
Секоја публикација во тираж од 2.000 примероци, ќе биде испечатена на квалитетна хартија, со високо професионални фотографии и популарни текстови кои ќе бидат напишани од познати и признати македонски експерти од соодветни области.
Министерката Канческа-Милевска рече дека пред започнувањето на проектот била извршена сеопфатна анализа на состојбата со застапеноста на научно-популарни публикации преку кои се презентира културното и природното наследство кое го поседува Република Македонија. - Беше воочена една загрижувачка ситуација со навистина мал и незначителен број публикации и книги, преку кои сите домашни и странски туристи можат да дознаат нешто повеќе за сето она што е карактеристично за нас, рече Канческа-Милевска.
Таа додаде дека затоа се решиле за реализација на овој проект и оти тој ќе ја промовира Македонија како атрактивна дестинација. Преку овие публикации, како што посочи таа, на светот можеме да му го презентираме нашето богатство и да му дадеме шанса да не запознае и да го почувствува духот на Република Македонија.
- Проектот „Публикации за најзначајните вредности на културното и природното наследство“ е мошне значаен проект, од научен и од туристички аспект и предвидува печатење на сто и педесет публикации, научно-популарни и добро опремени книги, во кои во интегрален вид ќе бидат прикажани најзначајните вредности од областа на културното и природното наследство, рече Канческа-Милевска.
Таа објасни дека проектот опфаќа четири едиции, археолошко културно наследство, сакрално културно наследство, едиција за ризниците во црквите и манастирите во Македонија и природното наследство.
Во едицијата посветен на археолошкото културно наследство ќе бидат презентирани публикации посветени на голем број археолошки локалитети низ Република Македонија, датирани од различни периоди, како Стоби, Скупи, Тумба Маџари, Бонче, Антички театар, Цареви Кули, Виничко Кале... Во втората едиција за сакралното културно наследство ќе бидат презентирани христијанските и османлиските споменици, за црквата Света Софија, Марков Манастир, манастирот во Зрзе, Јени Џамија, Исхак Џамија во Битола, Мустафа Пашина Џамија, Шарената Џамија.
- Во третата едиција се ризниците во црквите и манастирите во Македонија, каде ќе биде претставен избор на најрепрезентативните ризници, фрески и икони на бројните манастири и цркви, меѓу кои и ризниците на црквите „Благовештение“ и „Преображение“ во Прилеп, Галеријата на икони во Охрид, ризницата на црквата „Св. Кирил и Методиј“ во Тетово и многу други, рече Канческа-Милевска.
Во едицијата за природно наследство ќе биде претставена Македонија како земја со ендемична флора и фауна, национални паркови, езера, острови, водопади, кањони. Ќе бидат претставени националните пракови Маврово, Пелистер, Галичица, Охридското Езеро, Смоларските водопади...
Во посебната книга за Скопје, како што потенцира Канческа-Милевска, ќе бидат презентирани сите репрезентативни културни знаменитости кои се белег и симбол на препознатливост на македонската метропола.
Авторите на публикациите треба да крајот на годинава да ги реализираат сите текстови, а идејното графичко и ликовно решение за корицата на книгите за проектот „Публикации за најзначајните вредности од културното и природното наследство“ ќе биде избран на Конкурс за избор на идејното решение, кој е веќе објавен, и тој ќе биде доставен до избраната издавачка куќа која ќе ги реализира книгите од проектната програма.
Изданијата ќе бидат преведени на 15 јазици, англиски јазик, француски, германски, руски, италијански, јапонски, албански, турски, арапски јазик...мд/скс/14:03