10.04.2016, 16:42
Видеа во живо и на „Фејсбук“
Социјалната мрежа објави нови можности за да го засили своето емитување во живо, вклучувајќи и филтри слични на „Инстаграм“, како и способноста да најде стриминг од други видеа
Социјалната мрежа во средата обелодени нови можности за својата услуга на стриминг во живо, која ќе им овозможува на луѓето да емитуваат во живо видеозаписи преку интернет со користење на камерата од телефонот. Овие видеостримови можат да бидат видени од други луѓе на „Фејсбук“.
Меѓу новите можности: гледачите ќе може да кликнат на новите „реакции“ на „Фејсбук“ - емотикони за „лајк“, „љубов“, „вау“ и други емоции - во секое време во текот на преносот во живо. (Тоа повеќе личи на алатка на фокус-група.) И ако вие сте тој кој го прави стримингот во живо, ќе бидете во можност да додадете филтри на видеото, како и еднобојни или сепија тонови.
„Влегуваме во оваа нова златна доба на видеото“, изјави извршниот директор Марк Цукерберг за „Базфид“. „Не би бил изненаден, ако ’премотате напред‘ пет години, да увидите дека најголем дел од содржината што луѓето ја гледаат на ’Фејсбук‘ и ја споделуваат на секојдневна основа е видео“.
Ажурирањето на „Фејсбук лајв“ доаѓа како што се зголемува конкуренцијата меѓу стриминг услугите во живо. Најголемиот конкурент на „Фејсбук“ во оваа област е апликацијата „перископ“ на „Твитер“. Исто така, има шпекулации дека „Јутјуб“ на „Гугл“ подготвува сличен производ кој ќе се нарекува „Јутјуб конект“.
Фактот е дека стримингот во живо е преполн пазар. Една компанија, „Мееркат“, веќе беше принудена да се откаже од услугите за стриминг во живо, иако не одлучи со што ќе ги замени. „Фејсбук“, со своите 1,5 милијарди корисници, сака да се осигури дека тоа е најдобар избор.
Новите функции на „Фејсбук“ се дизајнирани да им помогнат на луѓето да се чувствуваат позначајно. Кога повторно ќе пуштите видео кое завршило, исто така, можете повторно да ги погледнете коментарите, кои се појавуваат како што стигнуваат за време на преносот во живо. „Фејсбук“, исто така, ви овозможува да ги поканите вашите пријатели да го гледаат видеото заедно со вас и да создаде дел кој ќе ви помогне да откриете нови видеозаписи.
Се чувствувате уметнички расположени? „Фејсбук“ ги разгледува претстојните функции кои ќе ви овозможат да пишувате на вашите видеозаписи во живо, „а ла ’снапчет‘“. Компанијата очајнички се обидува да го врати „снапчет“ бидејќи тој е многу популарен меѓу тинејџерите и младите луѓе. Оваа функција се' уште не е подготвена, но „Фејсбук“ најави дека „наскоро“ ќе дојде на пазарот.
Социјалната мрежа фрла големи пари во „Лајв“ и наводно се обидува да им се додвори на познатите личности, со нудење пари за да го користат. Најголемиот знак за неговото значење за „Фејсбук“: главната оперативна директорка Шерил Сандберг, и самата позната личност, очигледно ги предводи напорите за регрутирање.
Компанијата, исто така, им плаќа на медиумски компании да ја користат услугата. „Базфид“ и „Вокс медија“ го потврдија партнерството, а се шпекулира дека и други се вклучени. „Си-би-ес интерактив“, матичната компанија на ЦНЕТ, не е партнер.
Немојте да мислите дека ќе бидете во можност да го игнорирате она што „Фејсбук“ го наумил. Компанијата ги реорганизира своите алгоритми, за видеозаписи во живо да се појавуваат на врвот од секоја електронска информација. (ЦНЕТ)
Извор: Утрински весник
Коментари
jovan, 11.04.2016 00:31:17
Se poveke se zivee i ke se zivee vo virtuelen svet.Preku FaceBook i slicni socijalni mrezi ke dokazuvame i sami ke si se ubeduvame kolku ubavo ziveeme.Postirame ubavi sliki, tvrdime kolku ubavo si pominuvame na nekoe mesto, spored brojot na lajkovite si stvarame slika deka site ni se divat na postiranoto, a koga ke se zaprasame, kako vsusnost ziveeme i si go pominuvame zivotot, odgovorot e tragicen.No, toa nosi idninata,novi tehnologii,novi nacini na zivot, za nas postarite mozebi seto ova e glupavo,na za novite generacii toa ke bide nacin na ziveenje.Toa ke bide nivno vreme, i kako ke go organiziraat,toa e i nivno pravo.Toa sto jas,ili nekoj kako mene go kritikuvaat toj virtuelen svet,ne znaci deka sme vo pravo.Moeto vreme i nivnoto vreme koe doaga, ne se isti, a sekoj ima pravo svoeto vreme da si go zivee onaka kako nalagaat uslovite