„Парче од себе“

Инклузивен проект по повод Меѓународниот ден на лицата со посебни потреби

За одбележувањето на Меѓународниот ден посветен на лица со попреченост, Националната галерија својата општествена одговорност во насока на подигнување на личната и колективната свест за поддршка на ранливите категории традиционално ја реализира со инклузивна програма. Оваа година се одржа работилница во техника – мозаик, под наслов „Парче од себе“. Завршните работи од работилницата ќе бидат прикажани на изложба која ќе биде отворена на 15 декември 2023 во 13ч, во мултимедијалниот центар Мала станица. На отворањето ќе има обраќање директорот на Националната галерија д-р Дита Старова Ќерими и едукаторот Маја Димитрова. Воедно, дел од учениците кои беа вклучени во проектот ќе имаат музички настап.

„Вчера бев паметен. Затоа што сакав да го сменам светот. Денес сум мудар. Затоа што сакам да се сменам себе си“

Шри Чинмој

Секоја промена во општеството започнува првенствено од нас самите. Ако сакаме промените да се случат и вистински да функционираат, треба првенствено да ја имаме широката слика за светот околу нас, а тоа, меѓу другото, е и грижата и почитта кон сите, особено кон ранливите категории деца.

Во таа насока, постоењето на едукативните проекти на кои се работи според моделот на социјална инклузија се покажува како повеќе од потребно и исклучително функционално. Од година на година бараме нови начини и форми за учење, а сè со цел да се стави фокусот на нивната функционалност и нивните потенцијали.

Во амбиентот на Даут-пашиниот амам реализиравме креативни работилници со децата од ДУЦОР „Партениј Зографски“, училиште за деца со оштетен слух и говор, учениците од СУГС гимназија „Јосип Броз Тито“, паралелка меѓународна матура, СУГС „ Димитар Влахов“, како и со студентите од Машинскиот факултет, отсек Индустриски дизајн.

/cp/ps/Mail/Downloader?uid=38843&d=t.mk&u=kalina.premin&contentSeed=d80d8&pct=d1054&c=yes&an=DefaultMailAccount&disposition=inline&fp=INBOX&dhid=attachmentDownloader&ai=5&attachmentID=f_lq0yl7ds6

Во овој проект секое од децата не го даде само своето парче камен во создавањето на големата слика. Тие дадоа многу повеќе од тоа. Тие дадоа парче од себе!



Изложбата ќе биде поставена до 25 декември 2023.
м-р Маја Димитрова, координатор на проектот