Скопје, 9-ти октомври 2019 лето Господово - храм на св. Пророк Илија
На 9-ти октомври 2019 година, во нашата света, соборна и апостолска Цркви молитвено го прослави споменот на :
- Свети Јован Богослов, апостол и евангелист
- Преподобен Нил Калабриски
Во шеснаесеттата недела по Педесетница, на денот кога Светата Христова Црква молитвено го слави споменот на Свети Јован Богослов, апостол и евангелист ,во храмот на св.пророк Илија, во скопската населба Аеродром, светеникот Димче Бојковски во сослужение на ѓаконот Александар Брајановски отслужи Божествена Литургија.На Литургијата верниот народ се причести со Светите Христови Тајни.На крајот на Литургијата отецот произнесе беседа од житието на:
Свети Јован Богослов, апостол и евангелист
Син на рибарот Заведеј и на Саломија, ќерка на праведниот Јосиф. Повикан од Господ Исус, Јован веднаш го остави татка си и мрежите рибарски и заедно со својот брат Јаков тргна по Христа. И оттогаш повеќе не се одвојуваше од својот Господ до самиот крај. Со Петар и Јаков присуствуваше при воскреснувањето на Јаировата ќерка и на Перображението на Господ на Тавор. На Тајната Вечера ја положи главата на градите Исусови. Кога сите други го оставија распнатиот Господ, Јован заедно со Богородица остана под Крстот. На заповед од Господ тој потоа ѝ беше како син на Пресветата Дева и грижливо и служеше и Ја чуваше сe до Нејзиното успение.
По успението на Пресвета Богородица свети Јован отиде заедно со својот ученик Прохор да го проповеда Евангелието во Мала Азија. Најмногу се бавеше и дејствуваше во Ефес. Со својата вдахновена проповед и со своето чудотворство мнозина ги обрати во христијанството и од темел го расколеба незнабоштвото. Огорчени, незнабожците го врзаа и го пратија во Рим кај царот Дометијан. Пред царот беше мачен и биен, но бидејќи не му наштети ни најлутиот отров што му го дадоа да го испие, ни зовриеното масло во коешто го фрлија, царот се исплаши и сметајќи го за бесмртен го испрати на прогонство на островот Патмос. На тој остров Свети Јован мнозина ги обрати во христијанството со зборови и чуда и добро ја утврди Црквата Божја.
Овде го напиша своето Евангелие и Откровението. Во времето на царот Нерва, којшто им даде слобода на сите заробени, Јован повторно се упати во Ефес, каде што проживеа извесно време утврдувајќи го таму своето порано започнато дело. Имаше над сто години кога се престави кај Господ. Кога потоа учениците му го отворија гробот, не го најдоа неговото тело, но секоја година на 8 мај од гробот исходеше некој ситен прав, миризлив и лековит. По долгиот многутруден и многуплоден живот на земјата, овој возљубен ученик на Христос и столб на Црквата, се пресели во бесмртната и мирна радост на својот Господ.
Преминпортал (к.т.)
Друго:
Божествена Литургија во храмот на св.пророк Илија, Скопје (31.10.2018)