Во исто време со најновите барања од Грција и јазикот, како и идентитетот, да станат северномакедонски, на Интернет ќе се појави тонски запис од текот на целокупната 7. конференција помакедонистика одржана, наспроти протестите на грчкото лоби, минатата недела во Јута, САД
Тонски запис од текот на 7. конференција по македонистика, која минатата недела се одржа на Универзитетот во Јута, САД, ќе биде објавен деновиве на Интернет. Тоа е, заедно со можноста за претставување пред пошироката северноамериканска публика, една од најголемите придобивки на конференцијата организирана како дел од меѓународната соработка на Универзитетот,,Св.Кирил и Методиј“ од Скопје и повеќе северноамерикански универзитети.
Објавувањето ќе биде извршено преку чикашкиот факултет со посредство на професорот Виктор Фридман, славист и долгогодишен проучувач на македонскиот јазик, кој беше главен координатор на штотуку завршената конференција по македонистика оквалификувана од грчката дијаспора во САД како сталинистички историски реваншизам и антигрчка пропаганда.
- На конференцијата учествуваа и млади американски лингвисти и антрополози, кои веќе престојувале на Меѓународниот семинар за македонски јазик, литература и култура - вели Емилија Црвенковска, координатор на конференцијата од македонска страна.
- Македонистиката има перспективи на северноамериканскиот континент, а најзаслужни за тоа се професорите Виктор Фридман и Кристина Крамер, обајцата надворешни членови на МАНУ. Овие конференции се можност да се проговори за македонскиот јазик, за историјата и културата и можност за поголем број слависти и балканисти во САД да се запознаат со оваа проблематика - вели Црвенковска.
Конференциите се одржуваат на три години наизменично во Македонија и во САД и од сите досега се издадени зборници.
- Во Јута го промовиравме зборникот од претходната 6-та конференција што се одржа во Охрид во 2006 година. Рефератите од оваа конференција ќе бидат објавени на некој од универзитетите во САД. Професорот Фридман веќе дваесетина години ја координира оваа активност од американска страна и не попушта на никакви притисоци за нејзино спречување - вели Црвенковска.
Сепак, конференцијата се соочи со жестока антимакедонска кампања што ја организираше грчкото лоби.
- Па, тоа не го наруши многу текот на конференцијата. Ставот на универзитетот беше дека мора да се одржи сé што е во рамки на академската дискусија. Освен вториот ден, кога антропологот Лорин Данфорд отвори теми што го допираат егејското прашање. Имаше забелешки дека треба да се слушне и грчката страна, на што Данфорд одговори: „Организирајте грчко-американска конференција, со задоволство ќе ја слушнам и грчката страна“ - вели проф. Црвенковска.
Универзитетот објави и изјава на својата интернет-страница во која се објаснува дека „Јута“ обезбедува академска слобода, ги промовира еднаквите можности и ги почитува индивидуалните верувања. Во изјавата уште се вели дека Универзитетот е силен поддржувач на академското истражување, како и дека конференцијата за македонистика им дава можност на професорите од целиот свет да истражуваат културни, литературни и лингвистички теми.
- Тоа е и најголемата вредност на конференцијата, во нејзината поширока достапност, зашто македонистиката се популаризира во поширок круг публика од северноамериканскиот континент, каде што имаше и канадски слушатели - вели Црвенковска.
„Протестот на грчко-американската заедница треба да се земе во контекст на нерешеното прашање за името меѓу Македонија и Грција. Како коспонзор на конференцијата, ОМД сака да напомене дека конференцијата се одржува без никакви инциденти уште од 1991 година“, пишува Методија Колоски, претседател на Обединетата македонска дијаспора во писмото до Универзитетот во Јута. Во писмото уште се вели дека во време кога има многу емоции од Македонија и Грција поврзани со историјата на Балканот, размената на мислење со поддршка на Универзитетот во Јута ќе го унапреди отворениот дијалог.
Во најновите фази од апсурдниот грчко-македонски дијалог викендов побарано е грчките топоними да не се менуваат со словенски имиња, а јазикот, согласно со предложеното име Република Северна Македонија, да се вика северномакедонски.
Автор: Ј.Ф. Нова Македонија