(25.11.2010)


Моштите на света великомаченичка Екатерина од грчкиот метох на Синајскиот манастир на света Екатерина за првпат ќе бидат донесени за поклонение на верните во Русија: од 1 до 5 декември светињата ќе биде во Москва, а од 5 до 24 декември – во Екатеринбург, којшто на 7 декември ќе го одбележи празникот на својата небесна покровителка.

Ова беше договорено за време на посетата на Синај на руската поклоничка група предводена од раководството на „Екатеринбуршкото здружение што го носи името на светата великомаченичка Екатерина“.

 Синајските монаси за преносот на моштите

„Во манастирот на Синај од светите мошти се чуваат главата (черепот) и левата рака на света Екатерина. Главата на света Екатерина еднаш го напушти Синај - во 1995 година. Но, оттогаш беше донесен закон според кој не смее да се изнесува ваков вид на светиња од египетската територија без да се обезбедат огромен број документи. Ние уште имаме и дел од моштите на Светителката кои се наоѓаат во нашиот метох во Грција, и нивното пренесување е полесно. Имено, овие мошти (дел од телото на света Екатерина) и ќе бидат доставени во Русија“ - изјави игуменот на манастирот на света Екатерина, Архиепископот Синајски Дамјан.

Игуменот на манастирот Архиепископот Синајски Дамјан

Одговарајќи на прашањето на РИА-Новости за важноста на преносот на моштите во Русија, игуменот изјави дека неговата обител има „посебни односи“ со Московската Патријаршија. „Во нашата историја има многу примери на добри и блиски односи меѓу Русија и манастирот, и пренесувањето во рускиот главен град, и во Екатеринбург (чие име е поврзано со името на света Екатерина), на моштите на оваа великомаченичка, ќе биде многу важен чекор во развојот на нашите односи и за возобновување на старите добри односи“ - рече архиепиескопот Синајски.
Тој раскажа за чудесните исцеленија што се случуваат од моштите на света Екатерина. „Еден познат човек се молеше тука, неговата мајка боледуваше од рак - и таа беше исцлена... Понекогаш од моштите истекува миро. А сребрениот прстен на света Екатерина на кое верните исто така се поклонуваат претставува симбол на стабилен брак.

„Вие сте православни, и тоа ни претставува радост што овој благослов ќе биде кај вас и вие ќе бидете благословени со овие мошти“ - рече духовниот отец на Синајскиот манастир отец Павле.
Според неговите зборови, меѓу стотиците поклоници кои секојдневно ја посетуваат обителта има многу верници од Русија. „Многу руски верници доаѓаат со желба да станат монаси, но многу е тешко да добијат дозвола за постојан престој на Синај, бидејќи ова е милитаризирана зона“ - рече отец Павле.
Најлесен начин да се доближат до Бог, подвлече тој,  - „е да се стане како дете во душата“ и „да не се осудува ближниот“.

Светата великомаченичка Екатерина 

Ќерка на царот Конста. По смртта на татко ѝ живееше со својата мајка во Александрија. Мајка ѝ беше потајна христијанка, којашто преку својот духовен отец ја приведе кон Христовата вера и Екатерина. Во едно видение Света Екатерина прими прстен од Самиот Господ Исус, во знак на веридба со Него. Тој прстен до денес стои на нејзината рака. Екатерина беше многу надарена и добро школувана во грчката философија, медицината, реториката и логиката, а притоа беше и необично убава. Кога злочестивиот цар Максенциј им принесуваше самиот жртви на идолите и им наредуваше на другите да го вршат истото, Света Екатерина смело излезе пред царот и ја изобличи неговата идолопоклоничка заблуда. Кога виде царот дека е посилна од него во мудроста и во знаењето, повика педесетмина најмудри луѓе за да се препираат со неа за верата и да ја посрамат. Но Екатерина ги надмудри нив и ги посрами. Разјарен царот нареди сите педесетмина мудреци да се изгорат во оган. По молитвите на Света Екатерина овие мудреци сите пред смртта го исповедаа името Христово и се објавија себеси за христијани. Кога оваа маченичка беше во затворот, го приведе кон верата војводата Порфириј со двесте војници, а ја обрати кон Христа и самата царица (августа-василиса). Сите пострадаа за Христа. При мачењето на Света Екатерина ѝ се јави ангел Божји, го запре и го искрши тркалото на коешто беше мачена; а потоа ѝ се јави Самиот Господ Христос и ја утеши. После многу мачења ја убија со меч во нејзината осумнаесетта година, на 24 ноември 310 година. Од нејзиното тело истече млеко наместо крв. Чудотворните мошти на Света Екатерина почиваат на Синај.

Според преданието ангелите ги пренеле нетлените мошти на света Екатерина на гората на Синајскиот полуостров (веднаш до гората на Мојсеј), каде што беа и пронајдени во 4 век од монасите, по едно откровение. Моштите на великомаченичката со почести се пренесени во храмот на Синајскиот манастир, кој во 6 век за време на светиот император Јустинијан доживеа процут. Потоа и гората, како и манастирот го добија името на света Екатерина. 

Синајскиот манастир е основан во 4 век и е еден од најстарите христијански обители во светот кои се активни без прекин. Овде се наоѓа центарот на автономната Синајска православна црква, под чија јурисдикција се наоѓаат низа манастирски метоси во Египет, Грција, Кипар, Либан и Турција. Игумен на манастирот е Синајскиот Архиепископ, кого од 7 век наваму го ракоположува Ерусалимскиот Патријарх. Жителите на манастирот предимно Грци. Денес обителта брои 30 монаси, од кои две третини живеат во самиот Синајски манастир, а една третина во неговите метоси.

 

 

Извор: РИА-Новости

Преземено од МПЦ